پاکستان ایران پشین بارڈر مارکیٹ کا آئندہ ماہ افتتاح متوقع ہے،نوید قمر

اسلام آباد(آن لائن) وفاقی وزیر تجارت سید نوید قمر نے کہا ہے کہ پاکستان ایران پشین بارڈر مارکیٹ کا آئندہ ماہ افتتاح متوقع ہے جس سے دونوں ممالک کے درمیان آزاد تجارت کے رجحان میں اضافہ ہوگا۔انہوں نے کہا کہ پشین بارڈر مارکیٹ مکمل ہو چکی ہے اور اس کا افتتاح ابھی باقی ہے، جبکہ گبد، رمدان اور کوہک سمیت دیگر تین مارکیٹوں پر کام جلد شروع ہو جائے گا۔یہ بات وفاقی وزیر تجارت سید نوید قمر نے ایران کے پارلیمانی وفد جس کی قیادت ممبر اسمبلی مالک فاضلی کر رہے تھے سے ملاقات کے دوران کہی وفاقی وزیر نے کہا کہ دونوں ممالک کے درمیان باہمی تجارت کے حجم کو بڑھانے کے لیے دونوں جانب سے کل 12 بارڈر مارکیٹوں کی تجویز دی گئی ہے جن میں سے 9 کو باہمی طور پر منظور کر لیا گیا ہے انہوں نے کہا کہ بارٹر سسٹم کے تحت ان سرحدی منڈیوں سے تجارت ہوگی وفاقی وزیر نے کہا کہ پٹرولیم اور گیس میں تجارتی حجم بڑھانے کی اشد ضرورت ہے جس سے باہمی تجارتی حجم کو بڑھانے میں مدد ملے گی انہوں نے کہاکہ ہم ایران سے ایل پی جی گیس اوربجلی درآمد کر رہے ہیں اور اس کی درآمد کو بھی بڑھانے کی ضرورت ہے وفد نے فارماسیوٹیکل سیکٹر میں باہمی تعاون اور تجارت بڑھانے کی تجویز دی تو وزیر نے کہا کہ پاکستان فارماسیوٹیکل سیکٹر میں درآمدات بھی کر رہا ہے اور برآمدات بھی جاری ہیں انہوں نے یہ تجویز بھی دی کہ اگلے تجارتی وفد میں فارماسیوٹیکل سیکٹر سے تعلق رکھنے والے افراد کو شامل کیا جائے اس موقع پر ایرانی پارلیمانی وفد کے سربراہ نے کہا کہ پاکستان اور ایران کے درمیان 920 کلومیٹر کی مشترکہ سرحد کے ساتھ پڑوسی ممالک ہیں جہاں سے باہمی تجارت بھی ہوتی ہے اور لوگوں کی آمدورفت سال بھرجاری رہتی ہے انہوں نے اس خواہش کا اظہار کیا کہ دونوں ممالک کے درمیان باہمی تجارت کے حجم میں اضافہ ہو اور ایران نے پیاز اور ٹماٹر کی قلت پر قابو پانے کے لیے پاکستان کے ساتھ تعاون کیا۔انہوں نے کہا کہ ایرانی پارلیمنٹ کے رکن کی حیثیت سے وہ پاکستان اور ایران کے درمیان توانائی کے شعبے میں تعاون کو ضروری سمجھتے ہیں۔ اسی طرح ایران پاکستان گیس پائپ لائن پر بھی کام مستقبل قریب میں مکمل ہونا ہے۔ انہوں نے کہا کہ پاکستان میں سیلاب اور قدرتی آفات کی وجہ سے خاص طور پر سندھ اور بلوچستان میں مشکل صورتحال ہے۔ اس سلسلے میں حکومت ایران ان افراد کی بحالی کے لیے پاکستان کے ساتھ مکمل تعاون کرے گی۔