اوپنر بلے باز عبداللہ شفیق کو بخار، قرنطینہ کر دیا گیا

بنگلورو(آن لائن) پاکستان کے اوپنر عبداللہ شفیق بخار میں مبتلا ہونے کے بعد غیر ضروری ملاقاتوں سے گریز کر رہے ہیں اور بعض رپورٹس کے مطابق انہیں قرنطینہ کردیا گیا ہے، ان کے علاوہ پاکستان کرکٹ ٹیم کے دیگر کئی کھلاڑی ورلڈ کپ میں آسٹریلیا کے خلاف اہم میچ سے قبل وائرل انفیکشن کی زد میں ہیں۔ تفصیلات کے مطابق اوپنر اس وقت بخار اور فلو دونوں علامات سے دوچار ہیں، بیماری کے کسی بھی ممکنہ پھیلاو کو روکنے کے لیے احتیاطی تدابیر کی ضرورت ہے، شدید بیمار اوپنر کو قرنطینہ کر دیا گیا ہے اور انہیں غیر ضروری رابطوں سے گریز کی ہدایت کر دی گئی ہے۔عبداللہ شفیق نے پاکستانی ٹیم کے ساتھ پریکٹس سیشن میں حصہ نہیں لیا، جس نے 20 اکتوبر کو آسٹریلیا کے خلاف میچ کی تیاری کے لیے ایم چناسوامی سٹیڈیم میں ٹریننگ کی۔عبداللہ کے علاوہ محمد رضوان، شاہین آفریدی، سلمان علی آغا، زمان خان اور محمد حارث نے بھی ٹریننگ نہیں کی۔ اس سے قبل تیز گیند باز شاہین آفریدی اور اسامہ میر کو بھی بخار کی علامات کا سامنا تھا تاہم وہ اب صحت یاب ہو چکے ہیں۔پی سی بی نے ایک بیان بھی جاری کیا جہاں انہوں نے کہا: “کچھ کھلاڑیوں کو پچھلے کچھ دنوں میں بخار ہوا اور ان میں سے اکثر اس سے مکمل طور پر صحت یاب ہو چکے ہیں۔ جو لوگ صحت یاب ہونے کے مرحلے میں ہیں وہ ٹیم کے میڈیکل پینل کے مشاہدے میں رہتے ہیں۔” یاد رہے کہ پاکستان مینز ٹیم نے ٹریننگ کے حوالے سے اپنا پلان تبدیل کر دیا تھا۔ اس سے پہلے، انہوں نے آج ٹریننگ نہ کرنے کا فیصلہ کیا تھا لیکن انہوں نے شام 6 بجے سے رات 8 بجے تک (بھارتی معیاری وقت) دو گھنٹے ٹریننگ کی۔ پاکستان نے ایونٹ کے دوران اب تک تین میچوں میں دو جیت درج کی ہیں، لیکن اس کی واحد شکست ہفتے کے روز روایتی حریف بھارت کے خلاف ہوئی۔