ملک کو ایمان دار ججز کی ضرورت ہے عمران دار ججز کی نہیں، مریم نواز

راولپنڈی(آن لائن)مسلم لیگ (ن) کی چیف آرگنائزر مریم نواز نے کہا ہے کہ ملک کو ایماندار ججز کی ضرورت ہے عمران دار ججز کی نہیں، جسٹس مظاہرنقوی میں اتنی اخلاقی جر آت نہیں کہ استعفیٰ دیں،تاریخ میں ایسے ججز کا نام بابا زحمت کی طرح آئے گا، میں عدلیہ کی بات نہیں فیض کے چیلوں کی بات کررہی ہوں، پہلے اسٹیبلشمنٹ اور اب عدلیہ کے کندھے پر چڑھ کر آنے کی تیاری ہے،دوسروں کو چور کہنے والا خود سب سے بڑا چور نکلا، ہم پر الیکشن سے بھاگنے کا الزام لگانے والا عمران خان خود چھپ کر بیٹھا ہے،مہنگائی اور عمران خان کو اکٹھے اٹھا کر باہر پھینکیں گے۔ان خیالات کااظہار انہوں نے راولپنڈی میں مسلم لیگ (ن) کے تنظیمی کنونشن سے خطاب کرتے ہوئے کیا۔مریم نواز نے کہا کہ راولپنڈی کے عوام کو ن لیگ کا سلام، ن لیگ کے کنونشنز میں خواتین کی تعداد میں اضافہ ہو رہا ہے۔ انہوں نے کہا الیکشن میں معلوم ہوگا کہ مسلم لیگ ن کے پاس نوجوانوں کی فوج ہے، راولپنڈی کے عوام نواز شریف سے محبت کرتے ہیں، نواز شریف کی محبت راولپنڈی سے ڈھکی چھپی نہیں، نواز شریف نے پاکستان کی پہلی موٹروے کا آغاز راولپنڈی سے کیا۔مریم نواز نے کہا کہ نواز شریف خدمت میں مصروف رہا اور عمران خان گھڑیاں چوری کرتا رہا، ایک حکمران 4 سال بنی گالہ میں چھپ کر بیٹھا رہا، عمران خان نے ریکارڈ قرضے لے کر ایک منصوبہ بھی راولپنڈی کو نہیں دیا، نواز شریف، شہباز شریف کو تباہ حال پاکستان ملا، جب مشکلات ہوتی ہیں تو نواز شریف کو بلا لیتے ہیں، مشکلات کوئی پیدا کرتا ہے اور ٹھیک نواز شریف کرتا ہے۔مسلم لیگ (ن) کی رہنما نے مزید کہا کہ مہنگائی کا دوسرا نام عمران خان ہے، عمران خان کی نااہلی کی وجہ سے مہنگائی ہے، نواز شریف دور میں کھانے پینے کی اشیا سستی تھیں، نواز شریف دور میں روٹی 2 سے 5 روپے میں فروخت ہوتی تھی، مہنگائی اور عمران خان کو اکٹھے اٹھا کر باہر پھینکیں گے، عمران خان آئی ایم ایف کی شکل میں بارودی سرنگیں بچھا کر گیا.