ارشد ندیم برطانیہ میں گھٹنے کی سرجری کرائیں گے

لاہور(آن لائن) ایتھلیٹکس فیڈریشن آف پاکستان اور سٹار جیولین تھرور کوچ ارشد ندیم نے اپنی انجری کے بارے میں اپ ڈیٹ فراہم کیا جس کی وجہ سے وہ ہانگزو میں ہونے والے 19ویں ایشین گیمز سے باہر ہو گئے۔ اکتوبر میں ایک سینئر عہدیدار نے انکشاف کیا کہ فیڈریشن نے ان کی میڈیکل رپورٹس لندن میں مقیم آرتھوپیڈک سرجن ڈاکٹر علی شیر باجوہ کو ارسال کی ہیں تاکہ چوٹ کے بارے میں ماہرانہ مشورہ حاصل کیا جا سکے۔سٹار کھلاڑی کے گھٹنے کی انجری کے بارے میں اپ ڈیٹ دیتے ہوئے ان کے کوچ سلمان بٹ نے کہا کہ ارشد ندیم 4 فروری کو انگلینڈ جائیں گے اور وہ وہاں گھٹنے کی سرجری کرائیں گے۔ ارشد ندیم انجری کے بعد لاہور میں اپنی بحالی کے عمل سے گزر رہے تھے۔ ایشین گیمز میں ایتھلیٹ کی غیر حاضری قابل ذکر تھی کیونکہ پاکستان ایونٹ میں صرف ایک چاندی اور دو کانسی کے تمغے حاصل کرنے میں کامیاب رہا جس کی کارکردگی مایوس کن تھی۔سٹار کھلاڑی پیرس میں ہونے والے سمر اولمپکس سے قبل واپسی کے لیے پرعزم نظر آئے اور کہا کہ مجھے امید ہے کہ میں سرجری کے بعد 20 سے 25 دنوں کے اندر مکمل فٹنس حاصل کرلوں گا جس کا مقصد مقابلوں کے دوران تال، فٹنس اور اعتماد حاصل کرنا ہے۔ پیرس سمر اولمپکس میں ایونٹ سے پہلے ایک یا دو مقابلوں میں حصہ لینے کی کوشش کروں گا۔ انہوں نے 2022 کے کامن ویلتھ گیمز میں 90 میٹر سے زیادہ تھرو کرنے والے پہلے جنوبی ایشیائی کھلاڑی ہونے کا اعزاز اپنے نام کیا اور عالمی ایتھلیٹکس چیمپئن شپ میں چاندی کا تمغہ جیت کر پیرس سمر اولمپکس 2024 کے لیے کوالیفائی کیا۔