صدر پیوٹن نے یوکرین کے 4 علاقوں کو روس میں ضم کرنے کا باضابطہ اعلان کر دیا

ماسکو (آن لائن) روسی صدر پیوٹن نے یوکرین کے 4 علاقوں کو ضم کرنے کا باضابطہ اعلان کردیا ہے۔ ڈونیٹسک، لوہانسک، خیرسون اور زاپورڑیا کے شہریوں کو روسی شہریت بھی دی جائے گی۔اس موقع پر صدر پیوٹن نے کہا کہ سوویت یونین کا ٹوٹنا روسیوں کے لیے کڑوا سچ ہے۔ان کا کہنا تھا کہ روس میں ضم کیے جانے والے علاقوں میں جلد تعمیر نو کا کام کیا جائے گا۔انہوں نے کہا کہ یوکرین اب بھی جنگ بندی کی پیشکش قبول کرکے مذاکرات کی میز پر بیٹھ جائے۔صدر پیوٹن کا کہنا تھا کہ روس نئے ضم شدہ علاقوں سمیت اپنی سرزمین کی سالمیت کا دفاع جاری رکھے گا۔واضح رہے کہ یوکرینی علاقوں ڈونیٹسک، لوہانسک، خیرسون اور زاپورڑیا میں گزشتہ ہفتے ریفرنڈم ہوا تھا۔ریفرنڈم میں روس سے الحاق کے حق میں ووٹ دیے گئے، چاروں علاقوں میں ریفرنڈم روسی حمایت یافتہ علیحدگی پسندوں نے کروایا تھا۔