پاکستان اور ترکمانستان علاقائی استحکام، سلامتی، امن کے مشترکہ اہداف میں شریک ہیں،خواجہ آصف

اسلام آباد(آ ن لائن) وزیر دفاع خواجہ محمد آصف سے ترکمانستان کے سفیر عطاجان مولاموف نے ملاقات کی ہے۔ملاقات کا محور دونوں ممالک کے درمیان دفاعی شعبے میں باہمی تعاون کو بڑھانے اور مضبوط بنانے کے طریقوں پر غور کرنا تھا۔ وزیر دفاع نے اپنے خیالات کا اظہار کرتے ہوئے کہا کہ “پاکستان ای سی او اور دیگر علاقائی اور بین الاقوامی تنظیموں کے فریم ورک کے اندر ترکمانستان کے ساتھ تعاون کو برقرار رکھے گا اور مزید بڑھائے گا۔” انہوں نے مزید اس بات کا اعادہ کیا کہ دونوں ممالک کے درمیان دفاعی تعاون (2015) پر مفاہمت کی یادداشت کو اس کی اصل روح کے مطابق نافذ کیا جانا چاہیے۔ پاکستان اور ترکمانستان علاقائی استحکام، سلامتی، امن کے مشترکہ اہداف میں شریک ہیں اور اس طرح دونوں ممالک انسداد دہشت گردی کے اقدامات کے نفاذ میں قریبی تعاون کر سکتے ہیں۔ ترکمانستان کے سفیر عطاجان مولاموف نے پاکستان کی دفاعی صلاحیتوں کو سراہتے ہوئے کہا کہ دونوں ممالک کے درمیان دفاعی اور اقتصادی تعاون کے شعبے میں وسیع تعاون کی اچھی صلاحیت ہے۔ دونوں فریقوں نے اطمینان کا اظہار کیا اور مشترکہ مفاد کے مختلف شعبوں بشمول سلامتی، انسداد دہشت گردی اور علاقائی واقتصادی روابط کو یقینی بنانے میں تعاون کرنے کا ارادہ کیا۔