خسرو بختیار نے بھی تحریک انصاف چھوڑ دی

اسلام آباد (آ ن لائن) سابق وفاقی وزیر خسرو بختیار نے تحریک انصاف سے دوری اختیار کرلی، انہوں نے کہا کہ ایک سال قبل پارٹی کی اعلیٰ قیادت سے کہا تھا اداروں کے ساتھ محاذ آرائی نقصان دہ ہوگی۔اپنے ایک بیان میں خسرو بختیار نے کہا کہ پی ٹی آئی کور کمیٹی ممبر شپ اور جنوبی پنجاب کی صدارت بھی سال پہلے چھوڑ دی تھی، 9 مئی کے دل سوز واقعات نے مجھے مجبور کیا کہ پی ٹی آئی کے فلسفے سے دور ہوجا ؤں۔خسرو بختیار کا کہنا تھا کہ تحریک انصاف کے سیاسی فلسفے کے ساتھ اب نہیں چل سکتا۔انہوں نے کہا کہ میرا 25 سال کا تجربہ، مقامی، صوبائی اور قومی منصوبوں کے فرائض ادا کرنے پر محیط ہے، مجھے یقین ہے اب پاکستان کا مستقبل تقسیم اور محاذ آرائی کی سیاست میں ہرگز نہیں ہے۔