مسیحی برادری سمیت تمام اقلیتیں پاکستان کے مساوی شہری ہیں: بلیغ الرحمان

لاہور (آن لائن) گورنر پنجاب محمد بلیغ الرحمان سے لاہور کے بشپ ندیم کامران کی قیادت میں ایک وفد نے آج یہاں گورنر ہاؤس لاہور میں ملاقات کی۔ بشپ ندیم کامران نے مسیحی برادری کے ساتھ اظہار یکجہتی پر حکومت، وزیراعظم اور گورنر پنجاب کا شکریہ ادا کیا۔اس موقع پر گفتگو کرتے ہوئے گورنر پنجاب محمد بلیغ الرحمان نے کہا کہ جڑانوالہ واقعہ انتہائی دردناک اور قابل مذمت ہے۔ انہوں نے کہا کہ مسیحی برادری سمیت تمام اقلیتیں پاکستان کے مساوی شہری ہیں۔ گورنر پنجاب نے کہا کہ پاکستان کا آئین مذہبی جذبات کو ٹھیس پہنچانے یا کسی کی جان و مال کو نقصان پہنچانے کی اجازت نہیں دیتا۔ انہوں نے کہا کہ معاشرے میں برداشت اور ہمدردی کو فروغ دینے کی ضرورت ہے، انہوں نے مزید کہا کہ سکول کے بچوں میں مثبت سوچ، برداشت، دوسرے کے نقطہ نظر کو سمجھنے اور اعلیٰ اخلاقی اقدار کو ابھارنا بہت ضروری ہے۔ ان کا مزید کہنا تھا کہ معاشرے میں بقائے باہمی کے لیے رواداری اور ایک دوسرے کے نقطہ نظر کا احترام بہت ضروری ہے۔ اس موقع پر گورنر پنجاب نے کہا کہ وہ پنجاب حکومت کو سراہتے ہیں کیونکہ بہت کم وقت میں کچھ گرجا گھروں کو بحال کر دیا گیا ہے، باقی گرجا گھروں کو بھی جلد بحال کر دیا جائے گا۔ گورنر پنجاب نے کہا کہ پاکستان کے قیام اور قیام پاکستان کے بعد صحت، تعلیم، دفاع سمیت ہر شعبے میں مسیحی برادری کا کردار ناقابل فراموش ہے۔اس موقع پر لاہور کے بشپ ندیم کامران نے کہا کہ ریاست اور عوام جس طرح مسیحی برادری کے ساتھ کھڑے ہیں وہ قابل تحسین ہے۔ انہوں نے مزید کہا کہ مسیحی برادری بروقت ردعمل، معاوضے اور ان کے ساتھ اظہار یکجہتی پر حکومت کی شکر گزار ہے۔ سائرس بھٹی نے کہا کہ مسیحی برادری حکومت، گورنر پنجاب اور وزیر اعظم کی مشکور ہے جنہوں نے مسیحی برادری کے دکھ میں شریک ہوئے اور ان کے ساتھ اظہار یکجہتی کیا۔ وفد میں سائرس بھٹی، عاشر الیاس اور دیگر شامل تھے.