توشہ خانہ کیس میں عمران خان کی وارنٹ منسوخی کی درخواست غیر موثر قرار

اسلام آباد (آن لائن)اسلام آباد ہائیکورٹ نے توشہ خانہ کیس میں عمران خان کے وارنٹ منسوخ کرنے کی درخواست غیر موثر قرار دیدی۔اسلام آباد ہائیکورٹ کے چیف جسٹس عامر فاروق نے کیس درخواست پر سماعت کی، عمران خان کی جانب سے خواجہ حارث اور بیرسٹر گوہر عدالت میں پیش ہوئے۔ سیشن عدالت نے 18 مارچ کو عمران خان کو جوڈیشل کمپلیکس آمد پر وارنٹ منسوخ کر دیئے تھے۔اس کے علاوہ اسلام آباد ہائیکورٹ میں توشہ خانہ کیس میں عمران خان کی حاضری فائل گم ہونے کے معاملے پر سماعت ہوئی، عدالت نے توشہ خانہ کیس میں حاضری فائل گم ہونے پر آئی جی اسلام آباد سے رپورٹ طلب کر لیاہے جبکہ ٹرائل کورٹ سے بھی رپورٹ طلب کی گئی ہے۔ چیف جسٹس عامر فاروق نے ہدایت کرتے ہوئے کہا کہ حاضری فائل گمشدگی سے متعلق 10 روز میں رپورٹ پیش کریں۔