امریکی صدر کا ایمن الظواہری کی ہلاکت کا دعویٰ تاحال دعویٰ ہی ہے: طالبان ترجمان

کابل ( آن لائن) طالبان ترجمان ذبیح اللہ مجاہد نے کہا ہے کہ امریکی صدر کا ایمن الظواہری کی ہلاکت کا دعویٰ تاحال دعویٰ ہی ہے۔ غیر ملکی خبر رساں ادارے کے مطابق اپنے ایک ٹی وی انٹرویو میں انہوں نے کہا کہ امریکی صدر کا یہ دعویٰ تاحال دعویٰ ہی ہے، امارت اسلامیہ کو ایمن الظواہری کی موجودگی کی کوئی خبر نہیں تھی۔انہوں نے کہا کہ امارت اسلامیہ کو ایمن الظواہری کے ڈرون حملے میں نشانہ بننے کا بھی علم نہیں، ان کی جانب سے یہ معاملہ زیر تحقیق ہے۔ انہوں نے کہا کہ کابل ڈرون حملہ دوحہ معاہدے کی خلاف ورزی ہے، ہم افغان سرزمین کی حدود کی پامالی کی مذمت کرتے ہیں، اس طرح کے واقعات باربار دہرائے گئے تو نتائج کا ذمہ دار امریکا ہوگا۔